Денес, во нашето училиште, гостуваше екипа од Противпожарната бригада на Град Скопје. Поводот беше едукативна посета за учениците од прво одделение, со цел да се запознаат со работата на пожарникарите и нивната важна улога во заштитата и спасувањето на луѓето и имотот.
Посетата се реализираше во склоп на примена на програмата за самозаштита кај учениците, вклучување во проект за соработка со семејствата и интеграција со наставната програма по општество за возила со предност на поминување и професии на луѓето.
Пожарникарите пристигнаа со своето возило и на учениците им покажаа дел од опремата што ја користат при интервенции. Децата со голем интерес ги следеа објаснувањата и поставуваа прашања.
Највозбудлив дел од посетата беше практичната вежба – учениците имаа можност, со помош на пожарникарите, да учествуваат во прскање со црево и да почувствуваат како изгледа нивната работа во вистински услови.
Посетата помина во весела и едукативна атмосфера. Оваа активност придонесе за збогатување на нивните знаења и поттикна чувство на почит и благодарност кон лицата кои секојдневно се грижат за нашата безбедност.
